سلام يادار الوفا ديرة الجوف
سلام يادار الكرم والموده
مني تحيه محمله شوق ملهوف
قدرك بقلبي ديرتي من يعده
سكاكا ودومه واللقايط لها طيوف
حتى الرفيعه والنظايم أعده
زلوم ومعها صوير في داخلي تحوف
وهدبان هي وهديب قدر وموده
وقارا بقلبي والغلا ماله وصوف
والكل منها داخلي مستبده
أعشق ترابك دون كذبٍ ولازيوف
أعشق سموم القيض وبشتاك برده
دار الرجال اللي بها العز موصوف
غصبن علينا لاقصدنا نعده
أهل الدلا ل اللي بها الهيل معروف
والعود الأزرق ريحته مستشده
طيب وكرامه مع شهامه لها نشوف
يشهد لها القاصي ولو طال بعده
حتى الصغير اللي بها يكرم ضيوف
رابي على فعلن لأهله وجده
الجوف مزبن من زمانه له يعوف
وملجأ لمن هو قبلها باح سده
جاهم ويشكي في حياته له ظروف
ويشكي الزمان اللي وقف دوم ضده
يلقى بهم طيبه وفزعه بلا حسوف
ويبشر بعزه فعلهم من يصده
عدّوه منهم وأقسمو بالله حلوف
الدار دارك وأسخرو له بمده
وأن طالت القالات يلقى بها سيوف
سيوف لوجيه الأعداء مستعده
أفخر بكم من دون شكٍ ولاكسوف
أفخر ومثلي يفتخر من يرده
الجوف داره والفخر جاه مردوف
فخر الديار وفخر ربعه وجده
ربعه رويل مروضة كل ملقوف
يشهد لها التاريخ بالحق عده
وختامها رددت والقلب ملهوف
لكم سلامٍ خالصن مع موده
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.