حييت ياعثمان بن عوضه. لـ عوضه بن عثمان

حييت ياعثمان بن عوضه - عوضه بن عثمان

جيت ويبين بقلبي الملهوف شوقآ لك دفين
أسرت كلماته بجوفي ياسند ضهري سنه

حييت ياعثمان بن عوضه تحية صالحين
وتلقى عليك في الجنان مع النفوس المؤمنه

وأنا أدري أنك في عيوني غير كل العالمين
وابغاك تعرف قدرك اللي في فؤادي مثمنه

يامرحبا بك ياعصايب راسي اللي مايلين
رغم أضطهادات الزمان اللي مناه يلينه

يامرحبا بك وأحذ حذو الجد والحق المبين
وان مالحقت الجد خلك مثل أبوك وخذ منه

وأن كان همتك أعتلت بك فوق روس العارفين
جعلك تسير أطيب من أهلك في جميع الأزمنه

ماقد تمنى خاطري ياخاطري شيآ ثمين
أكثر من أنك تبلغ العليا بنفسآ محسنه

فعلا فرحت بشوفتك يفداك عالمنا المشين
لكنها تبقى الحقيقه في الحقيقه محزنه

يافلذتي هذا الزمن ماهو زمان الأولين
هذا الزمن لازال متغير ولاحد يضمنه

تساوت الأوزان بين أهل الجهل والعاقلين
وتطاولوا من لالاهم قيمه وشيمه وألسنه

وأهل الفصاحه والعقول النابغه والراشدين
زاحوهم أصحاب القلوب الماكره والمنتنه

وهذا الزمن يافلذتي أصبح زمان الحاسدين
وهذا الزمن يافلذتي عجزت وأنا أخمنه

لامن قصدت الدرب الايسر شفت خلق الله يمين
وان مٍلت للجال اليمين يغادرون الميمنه

ياابني صراعات البشر بين التفاخر والأنين
تزايدت والشر يبقى شر هذا معدنه

طالت مزامير الضلال وطاح نبراس اليقين
وأخاف لايأتي زمن يأسر أذان المئذنه

قدمت لك نبذه بسيطه وأنت مابين اليدين
وان كبرك ربي بتلقى مشكلتنا مزمنه

نصيحتي أمسك بدينآ مايشابه بأي دين
وازهد في الدنيا ترى ماشفت فيها مأمنه

أخلص لربك وأتبع منهج شفيع المسلمين
وإياك أن تتبع خطاوي ابليس أو تسمع منه

وأخفض جناح العطف والرحمه لنا يالوالدين
هذا الثواب اللي عسى نفسك لنا تستحسنه

نصايحي أكثر من الأبيات ماهي جملتين
وايامك أبتضهر لك أسرار كبار مكفنه

خذ من دروس الوقت عبراتك أذا عقلك فطين
وهمتك يابني خلها خيلك ولاترخي أرسنه

وأسأل إلهي يمنحك نورآ وتوفيقا متين
وأدعيه وأنا عبده انه مايباعدني عنه

وأدعيه يحييني ألين أشوف مجدك شوف عين
ذاك الفريد اللي تعلى الطيب والطيب أحضنه

كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
التعليقات المنشورة غير متابعة من قبل الإدارة. للتواصل معنا اضغط هنا.