رحـى العمـــر..!

بسم الولي بكتب على خيوط الآبلاج.
ارسم لهاجس داخل الجاش راجي.

من قبل تشرق شمسنا/ عين الافواج.
تنظر دروب الرزق و الرزق ياجي.

بالعدل مقسومة بلا زيف واحراج.
ميزانها ثابت ولابه عواجي .

بحر الشعر بين المحاني له امواج.
يلطم ظلام الجوف بلسان هاجي.

تدحم كتوف الموج به كل منعاج.
تنهج بعلم(ن) ما يجيه ازدواجي.

درس"خذيته من رحى العمر منهاج.
اصبح على هامة هل العرف تاجي.

هذا الزمن فيه الردى نجم وهاج.
والطيب لو هو بالمقارن سراجي.

بعض القلوب بهالزمن كنها الصاج.
معفوفن(ن) ويقول يازين صاجي .

يضحك بوجهك ليّن الوجه بحجاج.
وآنته على النيه طليق الحجاجي.

والمجلس اللي به سكاكين هرّاج.
يا عله لدولاب سفوى العجاجي.

مدهال شذابة عراقيب وازعاج.
دوما ًعلى الغايب تدق المحاجي .

قدر الردي بين المناعير مسهاج .
ماله مع اهل العرف بيع وخراجي.

ياطيب فال اللي هروجه لها أنتاج.
سكر يحلي كل بحر(ن) اجاجي.

مثل البدر يلمع على وجنة العاج.
طلقْ الحجاج وبالمعزه يناجي.

هذاك له وسط المعاليق مدراج.
يمشي على سندس غلا ببتهاجي.

ويقلط على شداد المعزه وديباج.
يقدع غلاته كيف كيف ومزاجي.

والخاتمه دام السطر خيط الابلاج.
بكتب يالين الله يجيب انفراجي.