برجين

برجين فيها تحوم وحوش وذيابه
وشلون اوادم تصير وحوش يالذيابي

برجين فيها حثالة ناس نصابه
كثير منهم ضعيف النفس نصابي

برجين فيها يجي شاري وجلابه
غدا العقل بين شاريها وجلابي

برجين فيها يضيع اللي تمشى به
يهل دمعه صغير السن به شابي

برجين فيها عثى ناهب ونهابه
ياويل حالك إذا ماكنت نهابي

(غربال حال البري مما يجرّى به
مثلي على الفطره الغربال يجرابي)

سود النوايا خبيث الفكر أدرابه
وأنا على نيتي والخالق أدرابي

عالفطره اللي فطرنا الله على كتابه
حرف النقا هو محل السر بكتابي

حنا القوارير حكم الله له أسبابه
ملعون ياللي تخون الله بلا اسبابي

واللي على البنت وده يفتل أشنابه
ماكبر شانه علي من فتل الاشنابي

(حرمه ويفرق عن الحرمه ب أسلابه )
(مابه رجوله وليته يلبس أسلابي)

حال المطافيق يالله حال غلاّبه
شيطانهم عالنفوس الدون غلابي

برجين والحال فيهاحالة الغابه
قانون (غاب) وضمير الحي به غابي

برجين تمحل بدار الخير ب اجدابه
ماتخضر ديار ٍ طوّل فيها إجدابي

اتعمرت والبنا بفنون جذابه
خربت من ذيابةٍ مظهرها جذابي

ناسن تبي تشتري هالناس بااجيابه
كرامة ٍ ماتباع بدفع الاجيابي

هاذي المدينه تبي عابد بمحرابه
وانا آتعبد بليلي وسط محرابي

آرد أنا مارد اللي صفو مشرابه
وردي بصبحي وليلي صفو مشرابي

هذي المدينه مدينه تفتح ابوابه
سى بوجه الطهر تفتح له أبوابي

جيت المدينه أبي آطيب صوابه
اليتم اقشر وأنا ياكبره صوابي

جيت المدينه وحيده واعشق ترابه
ماابيع نفسي لو اني آكل ترابي

جيت المدينه ذُهل عقلي من حرابه
تسنها ناس سلت سيف وحرابي

جيت المدينه أبي آعيد بحسابه
حياة حرماني واخطيت بحسابي

مثل الغريقه بقاع ابحور وغبابه
من ينتشل روح بين القاع وغبابي

الليل طول وأنا والشعر والهابه
نيران شعري غدت تلهب بي الهابي

هاضت قريحه صعيبن عندي أغضابه
قوي باسي ومن يقدر على أغضابي

أنا شموخ الشعر لابه ومن لابه
من طيب ذكره خسى كل جاهلٍ لابي

أبيات شعري تجي للنار شبابه
واللي كريمن يجي للنار شبابي

واللي يبي يرتقى لى راس مرقابه
قله ترى البرج مايرقى لمرقابي

كلي رُقي لي مجد للموت أرقابه
كم تنحني دون مجدي نايف ارقابي