أرتجيكم كل أبوكم تسمعوني وما يخالف
لو خطيت ولو زللت وما يهون السامعين
تسمعوا هذي القصيده حبرها من دمع ذارف
بلل الأوراق حتى أصبحت ما تستبين
بشتكي فيها حبيبه ورثتني جرح نازف
لعن أبوه (م) من تراث ٍ يشقى فيه الوارثين
يا بشر وش هو يسوي عاشق (ن) مذبوح تالف
عاشق (ن) يا ناس والله غير كل العاشقين
عاشق (ن) ما شاف خله في حشاه الشوق جارف
مثل بحر (ن) هاج أغرق فيه كل السابحين
يا بشر وشلون أبوصف قصتي في حب ناشف
مثل كسرة خبز يبست في يدين الناظرين
مثل حلم (ن) أو خيال (ن) أو طفل في صحرا خايف
ما درى وش هو مصيره يلتفت يسره ويمين
مثل نظرة زوج يائس حاير (ن) والوجه واجف
في حكاية حمل كاذب للي في عقمه سجين
آنا أدرى باشتياقي وأجزم إن الكل عارف
وش يسوي الشوق فينا وإنت سيد العارفين
لا يغرك في صمودي موتي مثل النخل واقف
ما يطيح وهو يشوف الكل حوله واقفين
يا بشر وش هو يسوي عاشق (ن) مذبوح تالف
عاشق (ن) يا ناس والله غير كل العاشقين
عاشق (ن) ما شاف خله في حشاه الشوق جارف
مثل بحر (ن) هاج أغرق فيه كل السابحين
أرتجيكم كل أبوكم سامحوني وما يخالف
لو خطيت ولو زللت ما يهون السامعين
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.