تبغون

تبغون لب الصدق والاّ عناوين
هذا اليقين اللي لفَتْ به (جهينه)

الشِّعر عرش وكل ابونا سلاطين
والكِل مِنّا حاكمٍ في مدينه

والناس نوعينٍ على زينٍ وشين
وِصْبوع كفّك ما تساوَنْ ثنينه

الزين يفرض نفسه بْفايق الزين
والشين ما ينضاف بو نفس شينه

والحلقه إن صكّت بَاْلِبْطان ترزين
ولا بوه رَدٍ ما تقلَّط بحينه

بالعون لي حم الخطب تستحقّين
نثور لك بالواجب اللى ترينه

دمتي بتيجان السلاطين تزهين
يا الزاهيه يا الباهيه يا الرزينه

الناس مخلوقين من مايٍ وطين
وانتي جبَلْك الرب من حور عِيْنه

على الثرى يمشون وانتي بعِلِّين
ما هوب فَرْقٍ بين قدرك وبينه؟

ما تستوين ويا السوى ما تواسين
تشرّقين المجد وِتْغَرّبينه

يا ام الحجى والحجل منّي سلامين
سلام من تسوين روحه وْعينه

عذروبِكْ إنّك كاملة عقلٍ ودين
والعِز تطوين الرِّسَنْ من يمينه

منفّله تحرِزْك (طَهَ) و (يَس)
وِمْنَتّبه بالأصل من ماجدينه

الحر الاشقر ولْد عَم الشواهين
ومن هَزّ بك في المهد ترْبَتْ يدينه

شقحا عذاريبِكّ تكيد المعادين
تدبل كبود القول وِمْواشيينه

يا الوافيه ما اظن تبغين تفطين
وانتي التي بْلَمْحَةْ بصَرْها فطينه

و (شِعْر النِّسا) وارد بذكره من سْنين
ولا هو بعيبٍ يوم بَيَّحْ كنينه

واشعارنا من فوق صدره نياشين
الناقد اللى قَل (عقله ودينه)

واصلاً فَخَرْ للشِّعر شِعْر المزايين
وتاج الشَّرَفْ بالعِز مِتْوارثينه

يا غاده بْسِنّة جدودِكْ تسيرين
حَقّك بياض الوجه تستاهلينه

يا (بِنْتي) بْذِمَّةْ صلاتي تساوين
جَر النِّسَمْ ما بين فَيْنه وْفَيْنه

يفداك من يهدِرْ عروبة (فلسطين)
واللي هتَكْ عرض (العراق) الأمينه

ويفداك من صدّر على ضفّة السين
وِكْنوز (حَتْشَبْسُوْت) مصر الثمينه

تسوين يا (بنت الإمارات) تبقين
(بنت) الذي تسوين (روحه وعينه)