يا نجد يا نجد العذيّة بك وحرت. لـ شامان مذكور الخالدي

يا نجد يا نجد العذيّة بك وحرت - شامان مذكور الخالدي

الله من قل البخت وين ماسرت
كن البلاوي لي عدو ٍ مثاري

مدري زماني جار والا انا جرت
حتى تساوى ليلها بالعصاري

لو لي جناحين ٍ عن المعضله طرت
ما جيت بين قفارها والضواري

ويّا المصايب يا وطن فازع ٍ صرت
ولا اقدر عليك اشنّ ذات الصواري

ليتك عدو ! واجيك بالغوج لا غرت
مار البلى موتي ولا يجيك طاري

يا نجد وآنا الخالدي فيك قد حرت
قمتي علينا تسحبين الشباري

ولاّ زمن بندر / وولّى به الفرت
ولا رجعنا نجيب فيه المصاري

ترهين للأجناب لبّاسة الشّرت
ولباسة الجوخ الحمر بالغَباري

باروا بك الشيخان يانجد مابرت
واستصقرت من قوّ فيك / الحباري

نجغم من الشاهي ونقحن من المرت
ونفوسنا دانن ٍ عليها انفجاري

كم شاوروني فيك يا نجد ماشرت
حتى نزلنا منْك وسط الخباري

عاينت فيك شبوك الاحرار ما زرت
خوف الرّدي يحكم براس النزاري

دارت شياطين القوافي ولا دارت
من خوف لا يفرح عدو ٍ بداري

يا تحقر بلادك على النّاس يا حقرت؟
حقران دار ولا اشوف احتقاري !

يا نجد من جورك بالاجواد قد ثرت
صرنا بيدينك لعبة ٍ كالاتاري

ماجد الزيد
(شامان بن مذكور)

كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
التعليقات المنشورة غير متابعة من قبل الإدارة. للتواصل معنا اضغط هنا.