يالله يامعبود ياهادي الضال
ياعالمٍ بالكون عرضه وطوله
يامهئ الارزاق علام الاجال
يامنزل كتابه وباعث رسوله
اطلبك تغفرلي وتلطف بالأحوال
وتجيرني من شر دنيا ذهوله
وتزيل همٍ ماهدا منّه البال
يمضي زماني وانهكتني حموله
الناس في وادي وانا اهيم فجبال
بوديان حزنٍ جرفتني سيوله !!
القلب فيه من المعاناه ولوال
والعين تبكي والسعاده جفوله!
اخايل الفرحه ولا شفت همال
متى تشوف العين لحظة هطوله ؟؟
لا ياقصيدي هات لي عذب وزلال
من القوافي بين الٍ واوله
جزالتك ماناشها نقص واشكال
ياكيف تنقص (نادره) من تقوله ؟!
جهزّ سهومك واعيره تشعل اشعال
واطلق عنان القاف واسرج خيوله
صوب الذي رجولته كلها اقوال
هي جعجعه من غير تظهر فعوله !!
ياهيه يامخطي المراجل وياضال
عن دربها مثلك تخونه رجوله
ترسل سهامك ذاه شاربك ماطال ؟ !
تعجز وانا اسمي فوق لا ماتطوله !
ياناكر المعروف ياخايب الفال
ياواطيٍ لا ماعرفت الرجوله
المرجله عندك شماغٍ مع اعقال
ثوبٍ مفصّل بس يحشاه زوله !!
وقفت لك بالعز والجاه والمال
وعلمتك الاكرام وشهي اصوله
شبيت ضوك بعد ماعشت بااذلال
واطلقت وجهك ياصغير الحموله !
من قيض وقتك صرت لك فيَ وظلال
فرشٍ خضر والكل يرغب نزوله
ياما انصحوني قلت ماغير عذال
واهم ماقالو يخون بسهوله !!
رميت كلمتهم على يابس الجال
واغلقت يمّك كل دربٍ سعووله
بانت علومك لي قصيرات وطوال
وستار عِرفك حان موعد سدوله !!
ماهمني قولك وانا بنت رجال
عزي جبل تبطي عظم ماتنوله
ارقا سنودٍ وانت مافيك تحتال !
وعلى القمم كسبت صوله وجوله
الفخر لي دله لها العز فنجال
وطيب المبادي نلت فيها البطوله
عرضي نزيه وسمعتي فخر الاجيال
وابوي شيخٍ وانت تفداء نعوله !!
ذكره بياض الوجه لوغاب فرمال
ولا انت حيٍ ماوصلت لوصوله !
ذكري ينومس كل ذربين الافعال
وتغتاض منّه كل كبدٍ غلوله
عسى حياتك كلها باارذل الحال
وحظك تعيس منوخٍ لك ذلوله !!
واشوف عينك تذرف الدمع همال
ومن عز نومك ياعساها ملوله
واشوف بقعا عامله فيك الاهوال
والوقت يعلن في حياتك ميوله !
وبين المشافي علَك اقفاي واقبال
شرٍ يصيبك حيرتهم حلوله
والله يحرمك كل تحقيق الامال
وتبقى عيونك فالزمان امعلوله
اكبر خطا صرت اصفق يمين بشمال
درسٍ تعلمته واراجع فصوله !!
ظنيت في شخصك تواصيف رجال !
ولاانت لاشٍ جاهلتك الرجوله !!
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.