هـاجوس الضمير

دق هاجوس الضمير وهاض بالي وأزدهر
وأنتقيت من المثايل واللحون الغاليات

أشتري وأبتاع من فكري وأصور بالنظر
وأتخيل صورة الموضوع من كل الجهات

زارني طيرٍ مكلف بالسلام وبالخبر
وأنشرح صدري لمرسول الرساله يوم جات

مرحباً به كثر ترحيب الصحاري بالمطر
يوم ينزال الدهر عنها ويغشاها النبات

الرساله غاليه وأحمض من الحنظل وأمر
الرضا والضيق في مضمونها متشابهات

جاتني من واحدٍ نحسب عليه ونفتخر
ف العلوم السابقات وف العلوم اللاحقات

أول أهدي له تحياتٍ كما قطف الثمر
عطرها الياقوت والكادي ثياب مفصلات

من قلوبٍ ما دخل فيها بغض ولا كبر
للقرابه والرفاقه طاهراتٍ صافيات

بشروه إنّا بخير وكل شيءٍ مستقر
لاحصل فينا سجين ولامريض ولاوفاة

و خبره يا طير يصبر لي شوي و ينتطر
لايحسب إني نسيت ولا يقول الوقت فات

باذلين جهودنا و الأمر لولاة الأمر
ننتظر ساعة فرج والصبر أخير من الشمات

ثم قله لا يجي في خاطره ضيقٍ أو كدر
من بغى العليا يويق لها بروس النايفات

الرجال تعيش في وقت الربيع وفالدهر
يطلبون الستر وأبواب الكريم مفتحات

لا تقول أخذت بك الغربه سنه وإلاّ شهر
تحرق أعصابك وتجعل للهموم مناورات

الغريب اللي يشق البر ويشق البحر
في بلادٍ تختلف فيها الطبايع واللغات

و أنت وسط المملكه مارحت في بعض الدير
من بقيق تشوف راس طويق وجبال السراة

إن تجنبت المخاطر ما على راسك خطر
في بلد نعمه وأمان و حيث ما تمسي تبات

وكل دربٍ فيه خير وكل دربٍ فيه شر
والدروب اثنين وأحسن درب درب الطيبات

هكذا الدنيا تجارب هكذا طبع البشر
هكذا الأيام وأقدام العباد مسيرات

الصديق اللي يعزك لو يطول بك السفر
ما يغير ماقفه تلقاه وقت الموجبات

بيت ما يبنى على ساس المعزه ما عمر
والمعزه وصفها يفرق على كل الصفات

كم قريبٍ تمتني قربه وقربه ما يسر
ينشرح صدره ليا حصل عليك ملاحظات

وكم بشر مجتمعين وفي تجمعهم ضرر
في مجالسهم سوى وقلوبهم متفرقات

تنخدع بعلومهم وقلوبهم مثل الحجر
وألسنتهم فالقفا مثل السيوف المرهفات

لا تواخذني ليا قلت أنتبه وأخذ الحذر
النصيحه واجبه للي يعرف الموجبات

أنشد مجرب ولا تنشد طبيبٍ معتبر
المجرب من تجاريبه يحل المعجزات

والختام أقبل تحياتٍ كما قطف الثمر
ولا تقول إني نسيت ولا تقول الوقت فات