يوم ابعدوا حالي على فراقهم حال
الله لايجزا الفراق ابتلاني
قالوا مشى والدمع من ناظري سال
وصديت لايلمح عذولي هواني
امشي ماشوف الاخياله والامال
اللي هوت قدام عيني بثواني
والناس قدامي تشابه بالاشكال
والليل في عزالضحى قدغشاني
قالو صقر وشبك على هذي الحال
وانا التفت مدري من اللي دعاني
اقفيت اجر اخطاي مكسور مهتال
مدري وش اللي صابني في اذاني
كني بلد جاها على الصبح زلزال
وضيع معالمها حطام المباني
وجدي عليهم وجد من عنده عيال
يرجي ذراهم لاحداه الزماني
ماتو سوا يوم انحنى ظهره ومال
واصبح خلي الدار والعز فاني
وجدي عليهم وجد من ضيع المال
من عقب عزه بالفقر والاماني
اللي نساني والامل فيه مازال
اظن لي في روض قلبه مكاني
وفي ذكرياته لي مقام(ن) ومدهال
عندي يقين برحعته لونساني
الصاحب اللي شوفته تطرب البال
كم ليلة(ن) يمه خيالي خذاني
يطري علي زول(ن)ولاكل الازوال
ماشفت مثله في جميع الغواني
عنود صيد وبالخلا تزبن الجال
ترتاع من ظل السحاب وتعاني
ترعى ربيع(ن) بين ريضان وجبال
من الخزاما والنفل ماتباني
عشبه طري وازهاره الوان واشكال
يلعبها لحاله وحيد(ن) وهاني
وانا عيوني بالسهر ليلها طال
على الذي وسط المواجع رماني
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.