عشقت ارض السعوديه. لـ آهات ليل

عشقت ارض السعوديه - آهات ليل

ياكبر غلطتْك ونار الحب لك حيه
وشلون تذبح بدون اسباب خفاقي!!

اكبر خطاياي "جيتك في صفا نيه"
ولا انت اصغر ذنوبك تهلك اشواقي

الحب بالجوف قد بانت مواريه
مابين زفرة حنين ودمعة احداقي

جمّع جميع المشاعر وارتكى هنيه
صفف دلاله وشب النار باعماقي

ياللي عشانك عشقت ارض السعوديه
ماهزّك الدمع ياللي بلل اوراقي؟!

دايم تقابل حسن ل /فعال بالسيه
وش باقي اليوم ما سويت وش باقي؟!

كنت احسب ان الغرام احلام ورديه
ومن قبل ل /اوصل لها كسّرت لي ساقي

من اول ان شفت زولك قلت ياحيه
واليوم لا شفت زولك شانت اخلاقي

ماهو بكيفك "تشق الصدر منيه"
منشان تحرق خفوقي شر احراقي

لا تحسب اني ابتنازل عن الديه
والله لتدفع دماك لموت خفاقي

كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
التعليقات المنشورة غير متابعة من قبل الإدارة. للتواصل معنا اضغط هنا.