يزورني طيفك مع الليل ساري
واشم طيبك والمحك طيف وأحلام
اصيح بسمك واحسبك لي مباري
اسمع صدى صوتك وآخايلك قدام
تغرني دايم طيوف الغداري
افز واعي واكتشف كله أوهام
من فرحتي ناديت بسمك اجهاري
فضحت نفسي والمخاليق نيّام
أسهر على شانك ولانته بداري
أرقد دقيقه وأكثر الليل ما نام
يطري على طاريك مليون طاري
شاعرك من زود التباريح منضام
أفراح عمري مثل شمس العصاري
ياسرع ماتغرب وتاتيك بعسام
صبري قضى من لوعتي وانتظاري
تكفى ترى حالى غدى جلد وعظام
قربك هناي وغيبتك إنتحاري
أرجوك لاتبعد ترى بعدك إعدام
شوفك سحايب ترتوي به دياري
وش عاد لو شوفك من العام للعام
شوفك مثل شمسٍ عشقها نهاري
تشرق على كل الكواكب والأجرام
حبك نهر وسط الشرايين جاري
حبك سحر عيّشني في غي وهيام
تفرك يميني يوم أشوفك يساري
وآعض لامنك تثنيت الإبهام
ياللي شعرك الليل فيه المساري
من شاهدك لو يسهر الليل مايلام
مثلك أبد ماشفت يابو خزاري
ياناقض المرجود يالابس زمام
انته غرامي غايتي وإختياري
يشهد على ماقول حبري والأقلام
مهما تغيب وتبتعد عن مساري
تبقى مواثيق الغلا طول الأيام
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.