البطاله

بين صكات الزمان وبين ميله وعتداله
غطرفت سود الليال ودق ناقوس الخطر

وبين تشتييت الهجوس وبين قلبي وحتماله
ساقني صدق الشعور وقلت لي وجهة نظر

وبين جمع المستحيل وبين ضرب الاستحاله
مابقى في داخلي شياً الاقي له عذر

مابقى في علبة الكبريت غير الاشتعاله
في صناديق القلوب اللي يفجرها القهر

سجل التاريخ دوره سميت بالانتقاله
من نتائجها نشوف الثلج يتحول جمر

كل شياً صار جأيز في زمان البرتقاله
مابقى شياً غريب إبها الزمان الا ظهر

زادة اسعار المعيشه والدهر نكس عقاله
صار ثقله ما تشيله روسنا مثل الحجر

والوظايف صنفوها بالفلوس وبالجماله
لا شهاده لا معدل كل شي وً له سعر

وصارت احوال الشباب الطيبين اخس حاله
الشهاده جامعيه والوظيفه منتظر

ينتظر فزعة ابوه وينتظر فزعة خواله
ينتظر والانتظار بذمتي موتاً حمر

لا تلومون الشباب ان زاد حره وانفعاله
الله اعلم ماله الا امرين لا ضاع الصبر

ياحرامي دارس ادروب المشاكل والنذاله
ولا ارهابي ملى بالغيض قلبه ونتحر

جمعو كل المصادر في صدى حل البطاله
وعلنوها بالاحاله في ختام المؤتمر

غرني طيب الوجيه وشفت مضمون الاحاله
نعنبوها من احاله كلها ظلم وغدر

كيف نرجع للقطاع الخاص في ظل العماله
بالامانه كيف نرجع والبلد كله بشر

ياكلون المستحيل وغشهم كلاً صحاله
والله انه مثل سوساً داخل الحب انتشر

صارة الدعوى تجاره وانحلاله بنحلاله
كل سوق وكل شارع فيه ماتلقى ممر

والمصانع والمتاجر والتكاسي والبقاله
حتى في سوق الخضار السالفه ادهى ومر

لو جمعنا لو حسبنا لو درج حبل المحاله
وش نقول وش نخلي سلم العد انكسر

حسبي الله في الجدار اللي كنفهم في ظلاله
ما يهمه غير يأخذ حصته بتلا الشهر

جابهم شخصاً غريباً ما يحسب راس ماله
من وسيعين البطون ومن خبيثين الفكر

واحداًما هو مفكر وش حرامه من حلاله
مأيهمه مأيهمه لو شرب جم البحر

عانقه راس التعالي وستباحه بالازاله
مأيبي غيره على كف البسيطه منتصر

صار من ظلمه وجوره كل همه ونشغاله
كيف بس يضحك الدنيا على وجه الفقر

وينكم ياهل النظام وينكم ياهل الرساله
عزنا في مملكتنا يا وسييعين الصدر

كل داء وله دواه وكل عصر وله رجاله
تحت ظل الآ السعود اللي لنا عز وفخر

وقفو سود القلوب ونظفو كل الحثاله
ما غسل وجه الطبيعه غير زخات المطر

انتم اصحاب القرار وكل رجل وله مجاله
وانتم اهل المعرفه والعين يقداها النظر

في النهايه سامحوني وعذروني في الاطاله
شاعراً عنده ضمير وقال له وجهة نظر