السحيمي والمنيعي سببوا فيض القريحه
والقريحه ماتفيض الا مع طاروق قمه
بعدما رممت موترك وتسمى بالمليحه
الشريطيه تلد انظارها يمك ويمه
موترك رزه وشخصيه ولكن الفضيحه
لوجلبت شعيل فالصندوق مات ابوه وامه
كلمتن ترضيك لاتضحك تراماهي صريحه
وان زعلت ارضيك وأرضي موترك وعيال عمه
لاتهون يا السحيمي قام عود من مطيحه
لا يهمك الأكلبي لو مايحبك مايذمه
انصب الطراد فالتنده ونعطيك الشريحه
العيون الحاقده لو شافته قالت وآلمه
مايسام الا سمينه مايدور للنطيحه
عطني اسبيره واشمر لك طرف ثوبي وكمه
مجاراة الشاعر حمد الدليهي..
.....
السحيمي وايته ياسعيد شاصاته جريحه
قبل والا بعد ترميمه مايلقى من يضمه
موتره ماعاد يصلح له ولا لغيره منيحه
وين ماوجهت تدري ماتحصلّْه مهمه
ان ذِكر غيث ٍ نباته خالطه ربله وشيحه
قبل يوصل غايته ياكم عوكاس ٍ يخمه
السحيمي ياسعيد القير بالغ في مديحه
يمدح اللي فات عصره وان بقى تلقاه رمه
لاقربت البلف تسمع كل ماتقرب نديحه
المكينه من تحتها صاير ٍ للزيت جمه
الزيوت .. (ا)تخر والديزل مع الشكمان ريحه
والبراغي لو تجدد ربطها ترفض تلمه
انصحه وانا معك والأكلبي عنده نصيحه
كان مايسمع نصايحنا ترى ماهي مطمه
افزعوا .. يااهل الوجيه اللي تْقدم والفليحه
علموه ان موتره حرف ٍ بلا شده وضمه
قلتها وان كان مني ذنب ياربي تبيحه
والسحيمي صاحبي معروف كل الطيب تمه
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.