يقولون وش ردك عليها وش بتقول
وانا اقول ويش اقول في مصدر الهامي
قضيت العمر راجيه والحول يتلا الحول
وطالت على رجواه من عام في عامي
جذبني غرامه واصبح الفكر به مشغول
رماني وصوبني بسهمه وانا رامي
وعشقته على وضح النقا وكل شي أصول
وحبه طبعته بين جلدي والاعظامي
احبه وحبه ياعرب ساري المفعول
وحبه بقلبي ماتغيره الايامي
لي مرني طاريه قمت اتغايا الزول
واقوم اتخيل صورته كنه قدامي
حطيت قلبي والمشاعر رهن وعدول
ورضيت حكمه لو حكمني بالاعدامي
وصنت الوعد واركيت كتفن يشل حمول
لعيناه عنيت الركايب والاقدامي
واليوم ياللي تنشدوني وش انا اقول
انا موقفي واضح وذي بصمة ابهامي
اخلصت له واوفيت والعلم هو المدلول
ومواثيق حبي حفظها عندي الزامي
ولكن خساره ماتوقعتها بتجول
وتجعل هوانا وهم من بين الاوهامي
لفاني الرسول وشيب عيني من المرسول
صدى علمها في الجاش اقوى من ألغامي
تقول النصيب وسيف الاقدار لي مسلول
جبرني علي فرقاك والقلب منضامي
وترسل تعاتبني وقالت انا المسئول
ابطيت غايب وانفلت ياعلي لجامي
وتقول طالت غيبتك مالقيت حلول
وارجو السموحه منك لو خاطري دامي
ولاأدري انا الجاني ولاانا المقتول
ولاانا اللي غيبته ذنب واجرامي
وانا اقول معقوله لا..لا مهوب معقول
بعتي الموده والغلا برخص الاسوامي
ومن باعنا بعناه ياناقض المجدول
خساره وانا أعدك غلا واثمن احلامي
وانا علي لي قلت با اقولها واطول
زبون المراجل والكرامه والاكرامي
مدامها الفرقا ودقت لحن وطبول
روحي في امان الله مانيب لوامي
روحي وانا مسامحك عرض الفضا والطول
والله يبيحك كان مااسقيتي الظامي
وداعة الله واحسبي عذركم مقبول
لوانه على كبدي كما الميسم الحامي
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.