بديت رجمن. لـ عبدالله بن مسفر بن عميّان

بديت رجمن - عبدالله بن مسفر بن عميّان

بديت رجمن طويلن ماله ظلاله
وانا ضمانن ولاعينت به فيّا

الدمع من حجر عيني كن همّاله
شختور صيفن تقفته الذواريّا

ياحميّد اركب عليه وكثّر الزاله
ودوّر على اللي يشابه عنز.. لدميّا

أشوف حالي نقص والزود في حاله
لو ان هرجه علينا فيه مَلْويّا

ترني شلّين الين امر مدهاله
واشوف من حيثني ويّاه ناتيّا

ليته ولد عمتي وآنا ولد خاله
ولاّ ولد عمه اللي له دناويّا

خله ويامل قلبن عصيّ عذاله
شرعه لمنه تولّع في حدن عيّا

متولعن في حسين اللون عزاله
حديثه أحلى من السكر بلوميّا

ياراكبن الشداد الزين يهياله
ماهو يداني عصا الركّاب توميّا

سفايفه كنها الغربان بحياله
والزور كنّه صغيرات المواجيّا

أشبّهه بالوصايف كن هوذاله
ذيبن تغانم توالي الليل عاديّا

ودّي مع اللي شلين بانت افعاله
مع ام تاجين فيها الشك ممليّا

الصيد بجله وقنّاصه على فاله
والرزق لاسهّله ربّي يجي هيّا

كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
التعليقات المنشورة غير متابعة من قبل الإدارة. للتواصل معنا اضغط هنا.