لاعاد علمٍ قريته في العناويني
ولاعاد من ذاعه ولا أخباره الشينه
خطبٍ دها المملكة في يوم الأثنيني
من هوله الدم وقّف في شرايينه
جمدت ساعة مكاني ما عرف ويني
الفكر محتار واختلت موازينه
لا والله إلاغشاك الدمع ياعيني
ولاهوب منكّف عنك لو تكفينه
اليوم يوم الحزن يالعين تكفيني
وش خانة الدمع يبقى عقب غالينه
محدن بلايمك لو تبكين حوليني
غيرك كثيرٍ بكوا من قبل تبكينه
ويبكيه محرابه وصوت المواذيني
والمجلس اللي بذكر الله محيينه
ونارٍ جذب ضوها ربعٍ مياميني
الجار منها وضيف الدار مدنينه
ودلال رسلان صفوها بصفيني
اقنادها الهيل للخطّار عابينه
ويبكيه من يشتكي من حظه الشيني
والمعسر اللي شكا من فقره ودينه
ويبكيه مكتوف في حبس المساجيني
أدمت صناقل حديد القيد رجلينه
وابوفهد لو بكيت لفقده سنيني
مايبرد الجاش ولاتطفي براكينه
بديار الأجناب ما لي من يعزيني
ياليتني حاضرٍ زحمة معزينه
وياليتني واقف ٍ بين المصليني
وأدليت في القبر معهم لبنه وطينه
حيل الله أقوى وأنا ماشي بيديني
أسلمت للحق والمكتوب راضينه
والله منساك ياطلق الحجاجيني
لوطالت أيام عمري وأبطت سنينه
يالله عسى القبر له روح ورياحيني
ويؤتى كتابه نهار الحشر بيمينه
يالله ياسامعٍ دعوى المناديني
يوم الموازين رجّح في موازينه
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.