مـلحمـة التبيناوي التاريخيـه

قال التبيناوي حسينات الأمثال
لو زاد موضوعه يزيد أمتثاله

لوكان باب القاف من دونه أقفال
فكيت عسرات القفول بسهاله

في قدرة المعبود علام الأحوال
أشفق على العسرات وآخذ جزاله

أقطف زهرنبت ٍ على سفح شلال
ملفوظ فيض فياض فكري صفاله

وقت الطلب ماشيّب القاف لوطال
ياجاء لزومه ما إنتظرت الوكاله

والشعر له قدره ماهو حكي جهال
تاريخ لأفعال الرجال بعداله

هذا الصحيح اللي ماهوهرج دلال
اللي مرامه يستفيد الدلاله

وأبداه ترحيب وتحيات وإجلال
من شاعر ٍ بدع المثل راس ماله

إعداد ماراحت من أجيال وأجيال
وإعداد من زار الحرم وإنتواله

وإعداد ماركبوا على كل مشوال
وإعداد ماهل المطر من خياله

مني لأهل حائل كريمين الأسبال
وأهل القرى والبدو واللي حواله

وبااللي لهم في سيرة المجد منوال
أهل الوفاء وأهل الكرم والشكاله

وأخص به شمر شريفين الأفعال
شمر مثل بدر الدجى بإكتماله

مزبان من يشكي من الظيم ولوال
ياضاق بالدنياء وقّل أحتياله

حائل ينابيع الكرم مضرب أمثال
منها بداء نبع الكرم من إجباله

دار الكرم من دور حاتم ولازال
رجالها ماعاد يرضى بداله

دار الكرم عشاقها ترخص المال
كل ٍ لفعل الطيب يرخص حلاله

لعل يسقيها من المزن هطال
متكامل ٍ كيله ميكائيل كاله

يرعد ويلعج بارقه يشعل إشعال
على النفود وضلعها مع سهاله

الفكر هاج وهيضه بعض الأحوال
زادت علوم مضيعين الدلاله

بااليوم يطلع لك ثمانين خيال
كل ٍ جعل نفسه قبيله لحاله

خيال دهم وصفروألوان وأشكال
وكامل قبايل نجد ماهي حواله

مره يفصل سيرة المجد تفصال
ومره يفسرها على ماطراله

قريت في معظم تواريخ الأبطال
مايكتب الرآوي وصيغة مقاله

اللي علينا مانسوا منه مثقال
واللي لنا من فعل يترك مجاله

بالذات تاريخ الجبل يوجد إهمال
والفعل شاهدوالتصنع فساله

ياناس خلوكم نزيهين وثقال
ماهي علوم ظنونكم وأحتماله

يجحد تواريخ العرب كل محتال
اللي يجيب السالفه من خياله

ماإنت متأكد لك عن الظلم معدال
الصمت حكمه والتخبط رزاله

الصدق وآضح ماعلى الصدق مدخال
والصدق ماأنتم والحقيقه زماله

حذراك ياللي مشغل ٍحالك إشغال
العلم من دونه نوادر رجاله

أرفع مقامي عنك والعذر بطال
ماهو عذر قولك من الناس قاله

مني لمن حاش المدايح بالأفعال
اللي يحوش المرجله حي فاله

ويااللي تقول البدو باالدين جهال
والحضر عكس البدو مابه جهاله

أعطيك نبذه عن كريمين الأسبال
هذا الجواب لمن وصلني سؤاله

قدر السؤال أجيب ماني بشمّال
المسأله ماتقل حي ٍ دراله

من هجرة اللي خصه الله بالإرسال
خير العباد اللي بعث باالرساله

من دور زيد الخيل للخير منهال
سمي بزيد الخيرنادر خصاله

من نسل حاتم طي وعدي نزال
بجبال طي وقبر حاتم قباله

بعد وفاة المصطفى صار الإغفال
وكثير ناس إرتّد نحو الضلاله

إلا اللذي من طي ما إرتد رجال
عن سيرة محمد وصحبه وآله

وفي قرن رابع عقد رابع بالأطلال
بني صخر فيها وتسكن تلاله

وفي قرن خامس عقد ثالث بني هلال
وبني هلال ٍ غربت في حلاله

ثم الفضول إستشملت غرب ترحال
مابين الأردن والعراق أرتحاله

وفي قرن سابع والجبل دونه أبطال
فيه الضياغم ماضيات ٍ فعاله

جومن عبيده باليمن بعد ماسال
من نسل قحطان إبو يعرب أصاله

من طي إبن كهلان ضيغم والأشبال
ضياغم ٍ مايزحم الضد جاله

وشمر بعد من طي في ستة إرجال
خوف التشعب بإختصار بالأطاله

وست مائه وستة وخمسون الإخلال
دولة بني العباس صار إحتلاله

وإزدادت الفوضاء والإحباط ينهال
والخوف حل بنجد واللي تواله

ولا إستعاد الحال من بعد مامال
إلا اللذي من مصر جيشه مشاله

أعظم حدث سجل على مر الأجيال
سلطان غطز من المماليك ناله

هزم المغول وعاد بغداد وإنجال
ضياع كامل نجد واللي شماله

وبهيج من عقده زبن طيّب الفال
دخل بمردان إبن ضيغم دخاله

قال السلامه يوم تغني عن المال
آخر عقد من قرن ثامن زواله

باالغصب حدوه السناعيس الآمال
وزانت لإبن بقار جوّ وصفاله

وعلي شكى له جمرة ٍ من ولد خال
والنار يبداء بالشرار إشتعاله

والشيخ من ربعه شكاء ضيقة البال
وإبليس جت له فرصته وأ حتياله

وجماعة الشيخ أعتزو دون عذال
يبغون جو بقو ماهو جماله

عياء به الشايب على كل أبو حال
والخال وآفاه القدر باالعجاله

وعلي عياله خمسة أولاد عيّال
وقت الغضب وإلاالرضاء حي فاله

جلمود وجليميد وحسين رجال
ودهمان وعليان خمسه عياله

سادسهم الشايب ولاحوله أزوال
دغيرات باللقوّات يظهر جماله

نعم دغيرات الجبل مابه إجدال
بخشوم صنع البنت ماهو ختاله

كل ٍعرف مرماه من قبل شوال
حدب ٍ ضرايبهن سريع ٍ زواله

ويامن جهلت العلي تبشر بالإذلال
دمي على ربعي سريع أنفعاله

وقت الغضب عندي دوى كل من عال
سنايدي مايزحم الضد جاله

كانه عدم عرف بتفاصيل الأحوال
خذ منّي التاريخ صدق ودلاله

آل علي تاريخ ِ توارثه الأجيال
ماكل عصمان الشوارب قواله

وإبن رشيد وعلي من صلب رجال
من صلب مغوار ٍعمامه خواله

الضيغمي ستر اللذي تلبس الشال
عوق العديم ليا أعتلاها جفاله

من روس شمر زبن مقطوع الآمال
شمر ليا إشتّد الوطيس إشتعاله

الضيغمي زيزوم غلباء ليا قال
تمشي سناعيس الجبل في مقاله

ضياغم ٍ يازلزل القاع زلزال
عز الرفيق وفزعت اللي عناله

من شجرة ٍ خضراء لها فّي وضلال
بيت الشرّف مبداءالشريف إنتماله

وللعلي بأعلى ذروة المجد منزال
روس الطناياء مزبن اللي شكى له

لا ثمائة وخمسون ورى الحول ماحال
وإبن علي شيخ الجبل من خلاله

في عام تسع مائه وخمسه لها حال
شيخ الجبل علي ٍ مع اللي تواله

علي ثلاث عقود والشيخ فعّال
علي كبير العلي شيخ الشكاله

من بعد والدنا علي فيه عيّال
حر ٍ ولد حر ٍ ٍ يعوضك بداله

وفي قرن عاشر عقد سابع فلا زال
إبن علي صالح حكيم ٍ زهاله

عامين من غير الثلاثين تفصال
وعبدالمحسن الصالح نهّض وإستواله

عشر وثمان إسنين عهده بالإجمال
وبعده مهناء بن حسين إرتكاله

عامين من غير الثلاثين وهلال
وعلي الثلاثه والثلاثون طاله

وعيسى علي خمس وثلاثون شغال
ومثله محمد با العدد وأكتماله

وعشرة سنين وخمس فايزله أفضال
وعبدالمحسن الفايز تولى مجاله

سبعة عشر عام ٍ وعشرين بإكمال
ومحمد العيسى بعقل وثقاله

أربع سنين مع ثلاثين با أطوال
ضفه شمال ليا الشرارات ناله

الأشمل المعروف والإسم دلال
فيه الدهى والدين ضد الضلاله

محمد العيسى على الجهل زلزال
ناصر هل الدعوة جهاد وبساله

مذهب جيوش الترك قصاف الآجال
ذبح ثلاثمائه لنصرة رجاله

فك الحصار عن إبن وهاب باالحال
من الترك لأجل الدين واللي دعى له

إبن علي وإسمه على القبر لا زال
مكتوب إمام المسلمين لنظاله

اللي بناء برزان ساسه والأميال
وبرزان اللي كم شيخ قوم ٍ لجاله

وبعده محمد لكن الوقت ميال
الدار من سو الدهر شأن حاله

محمد عبدالمحسن علي وقت الإمحال
الدار خمس سنين غبر ٍ لياله

الشيخ أخو خنساء للأثقال نقال
كريم والسمن العرابي مثاله

لولا أخو خنساء راحت شيوخ وأطفال
ياكثر ميلات الدهر وأعتداله

ضف اليتاما والأرامل وكهال
والجار واللي جور بقعاء جراله

مع اللذي لحقه من الجوع سلال
تعتاش خلق الله بعيشة عياله

محمد ثمان ٍ فوق عشرين مامال
بعقل ٍ وثقل وبعد رآي وجزاله

وصالح عبدالمحسن لما كاد حمال
ستة عشر عام ٍ بعزم وصماله

وفي عقد ثالث قرن ثالث عشرحال
الشاعر مبيريك بانت فعاله

أولاد علي ٍ قال ماتدفع المال
ماندفع الخاوّه لهم مستحاله

يوم أشملّت شمر وقف موقف أبطال
في صف أخو سلمى بعقل وبساله

راع المناخ اللي شرب كل فنجال
مفتاح أخو سلمى بقوة رجاله

أخوان سلمى والدغيرات زعال
وشارك بعض عبده بنفسه لحاله

ومسلط وإبن سلطان وآفين الأفعال
وابن الشرف عدوان شيخ الطواله

والشاعر مبيريك للحمل شيال
سم ٍ على كبد المعادي مقاله

منه العواجي يسكب الدمع همال
قال التبيناوي لقاء شف باله

والومد قاله باالمثل ضمن ما قال
جتنا جموعك ياعريب السلاله

وإبن قويفل قال تو الخطر زال
يرعى جملنا مطلقينن عقاله

وما قاله الهقاز في بدع الأمثال
لعل دايس جنة الخلد فاله

من يوم دايس بين الأبطال جوال
عدّد وصايف كل جمع ٍ لحاله

كسب التبيناوي جمل نوت ودلال
كيف العواجي والنجر والزماله

الصدق مايزعل من الناس عقال
يوم الجهيلي قام يشمّت بحاله

صارت براس عقاب شيال الأثقال
من ضربة مفيز العفر يوم شاله

ومشاري الشقاق لحجاب قتال
فوات قبل مدورين الجماله

والمرتعد من كف دوشق بالإعجال
مسّكت صياح الورع ماهم بحاله

خيالة الصوت المتلي بالأفعال
لعيون هيفاء عن شجاع ٍ غداله

والشيخ مزعل بين هايس وخيال
وبالقول خيال القدورات طاله

وعيسى عبيدالله حكم بس ماطال
سبت خلاف ٍ بين عم ٍ وخاله

عامين به كل المصايب والأهوال
وافق مشاكلها بسو أحتماله

لو رجع سنه وشهور والكيد يكتال
وإبو طلال إبن الرشيد إرتكاله

وإبن رشيد عبيد وأخوه صوّال
عبدالله اللي كون قمعة حكاله

وإبن الرشيد أعلن تفاصيل الأعمال
الشيخ عبدالله تزعم عياله

وعبيد للعدوان سم ٍ وغربال
فيه الشجاعه والكرم والزعاله

وإلا أخو نوره منه الأبطال تهتال
شيخ ٍ تشرف سيرته من قراله

في عقد سادس قرن ثالث عشر هال
من بعد عبدالله طلال إستواله

وبعده حكم متعب وحولين ماحال
وحولين مثله بندر ٍمابقاله

وإبن رشيد محمد ٍ طلق الأشمال
عشرين عام وست جوّد حباله

سموه باالمهاد تمهيدالأطوال
من مثل تلك التوسعه مستحاله

من الشام للبصرة تسلمه الأموال
لجده ليا الطايف ونجد بكماله

لغربي مصر لحدود الأتراك باأميال
واللي رفض دفع الزكاوي غزاله

سموه إسم خيران خيراته جزال
والمصطفق يصفق على ماطراله

معه حمود عبيد للكود حلال
يقلط على حوض المناياء لحاله

وألف وثلاثمائة وخمسة عشر شال
عبدالعزيز إبن رشيد إنتخى له

هزيمته لإبن صباح أظهرت حال
والشيخ في كون الصريف إنشغاله

وإلا الجنازه كنّه الموت مرسال
من قبل عشر سنين صار إغتياله

وبعد الجنازه متعب ٍ بس ماطال
إشهور قبل الحول تكمل لياله

وبعده عيال حمود والقلب ياشال
على اللحم والدم شتّت وصاله

بين إختلاف الرآي وهروج الأنذال
ثالث سنه وأوضاعهم ينرثاله

بعد عيال حمود وظروف الإشكال
شاله سعود أبو خشم وإرتكاله

يوم إنذبح زامل حدث بعض الإخلال
الشيخ إبن سبهان هوراس ماله

زامل من زمول ٍ يشيلون الأثقال
هو قائد القوات لحظة قتاله

وسعود عشرسنين وآفته الآجال
وعبدالله المتعب شهور ولياله

وبعده محمد بن طلال ٍ ولا طال
باالصلح مع عبد العزيز بسهاله

من حصله يستا هله والجهل زال
والملك ملك الله عظيم الجلاله

والناس كل ٍ دون حقه له أفعال
قبايل ٍ به حقها من إرجاله

ياما من الأبطال والصدق ينقال
جنوب شرق وغرب وإلاشماله

أهل الوفاء والطيب من كل الأشكال
من هام صعبات المراجل رقاله

الله يديم الأمن في عهد الإبطال
القادة اللي نلتجي في ضلاله

للشعب عز وخير وأنعام وآمال
آل السعود محكمين العداله

الله جعل فيهم عن الضيم مدخال
أولاد عود ٍ كايد الحمل شاله

عاصر لياليها الصعيبات باأفعال
أنهى مشاكلها وطوّع جماله

صفى قلوب الشعب من سو الأعمال
أقام شرع الله ووصى عياله

خلّف صناديد ٍ على قلب رجال
للواقع الحاضر كبير الدلاله

الخير عّم المملكة كل الأشكال
الحمد لله والشكر والثنى له

طالبك يامنزل تبارك والأنفال
عبدك وإبن عبدك عليك إتكاله

يا منجي سفينة نوح من غب الأهوال
يامن شفيت أيوب من سو حاله

يالتمهل ولا تهمل ولو طال الإمهال
يارب عبدك لا تخيّب سؤاله

لإنك تعز اللي للأجواد مدهال
والمملكة واللي بخير ٍ سعاله

وختامها صلوا على خير مرسال
شفيع الأمه يوم تحصى عماله

صلوا عدد ماهّل من يوم وهلال
على رسول الله وصحبه وآله