بديت باسم اللي رفيع(ن) جنابه
الواحد اللي في السموات عالي
من دون كل الناس ماصك بابه
ويفرح إذا زادوا عليه السؤالي
من بعد ذا سر ياقلم بالكتابه
وارسل لابو محمد جديد المقالي
سلام(ن) احلى من العسل في شرابه
سلام(ن) انقى من قراح(ن) زلالي
واختص من له بين ربعه مهابه
قدره كبير وعند الاجواد غالي
ابو محمد لا عوى(ن) الذيابه
يرسي وكنّه من رواسي الجبالي
ابو محمد سعد منهو لجابه
منّه يروّح داله البال سالي
ابو محمد في الكرم ينحكى به
شرق(ن) وغرب(ن) مع جنوب وشمالي
حر(ن) ولد حر(ن) براسه ذرابه
متوارثين الطيب اول وتالي
طيبه على ساس(ن) ولا هو نهابه
من عصر جدّانه وهو لا يزالي
طيبه على الأجناب مثل القرابه
يستاهل العليا كريم الخصالي
وصيته بفعل الطيب كل(ن) درابه
وذكره ينومسنا اذا جا مجالي
عزم(ن) وجزم(ن) صادق(ن) في جوابه
حلاّل صعبات الامور العضالي
مضرب مثل ما فيه مثله ولا به
يالله عسى ايامه سنين(ن) طوالي
واختامها مسك(ن) ثميناً حسابه
والعود الازرق في محل الرجالي
وعلى النبي صلوا ومعه الصحابه
اعداد ماتبرق بروق الخيالي
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.