ريـح الصبـا مـع قرايـا نـجـد والعبـلـه. لـ مشعل عوض العتيبي

ريـح الصبـا مـع قرايـا نـجـد والعبـلـه - مشعل عوض العتيبي

ريح الصبا مع قرايا نجد والعبله
مستوطنه في ضميري قبل مااجيها
ديار ربعي وكل(ن) عارف(ن) سبله
ياخذني الشوق لامن مرّ طاريها
وجهي عليها اليا وجّهت للقبله
الله يبارك بتربتها وأهاليها
يالله طلبتك خيال(ن) صادق(ن) وبله
يسقي ثراها من اولها لتاليها
يفرح به اللي قضى عمره يسوق ابله
يتبع هواها ويمشي في مفاليها
من عهد جدّه وابوه ووقت يُحسب له
أتلاااد ماهو ملقّطها وشاريها
ودّي اسيّر على شرواه واتعب له
واسجّ رجل(ن) على الطرقه مضرّيها
شوف الفيافي ربيع القلب واطرب له
لاصار وسم(ن) بكور وناقع(ن)فيها
كبدي من اهل الهروج العوج مندبله
اباابتعد عن سوالفها واخلّيها
والطيّب اشتاق لمخاواه واندب له
خوّة مطاليق تعجب من يخاويها
ادمح خطا صاحبي والهرجه الخبله
من طيب خاطر واطوّفها واعدّيها
لو كلّ من زلّ حسّب له وعاتب له
ماعاد تلقى مشاكيل(ن) تصافيها

كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
التعليقات المنشورة غير متابعة من قبل الإدارة. للتواصل معنا اضغط هنا.