الموجعــه

معقول .. اغيّر عقول الخلق .. واقنعها ؟
ماهوب معقول .. ياللي قال :-.. معقوله

ياخي .. انا يالله بنفسي اطوّعها
مالي على الخلق لا حكم ٍ .. ولا طوله

يالأجودي لو بنفسك شيّ موجعها
هالوقت غيّر كثير نفوس .. بسهوله

نفس ٍ ذليله .. تشوف المال .. يرفعها
ونفس ٍ عزيزه .. تركها الفقر .. مذلوله

ورجل ٍ يجيها اللحّاف .. بطقّة اصبعها
ياللي يمدّد بقدّ لحافه رجوله

اثبت لك إنّا مع انفسنا .. نخادعها ؟
وانّا نعيش الهزيمه .. كنّها .. بطوله؟

نقول دنياك لو ماطاعتك .. طعها
وهي عمرها ماتطيع الحيّ .. بميوله

وبإسم الرجوله عقب مالوقت شيّعها
قمنا نكابر بوقتٍ .. مابه .. رجوله

واحلامنا كذبةٍ عشنا نرقّعها
ونضحك على بعضنا بأحلام .. مقتوله

بإيدين مشلوله بنبني مرابعها
بالله .. من قد بنى بإيدين مشلوله؟!!

والنيّه الطيّبه من طيب منبعها
وكلّن على قدر طيبه .. يسرج خيوله

مثل القصيده يدلّك طيب مطلعها
عنها .. وتبقى بكل لسان مقيوله

مانيب مخبول يعشق بنت ضيّعها
ولا سالفة عاقلٍ هايم بمخبوله

السالفه كان ودّك تعرف اسمعها
ياللي تلوم الدحيمي اسمع لقوله

زرعت ورده .. وليتي قبل مازرعها
في روض مشتل .. نشدت .. الروض منهو له؟!!

ويوم ازهرت شفت راعي الروض .. يقلعها
قدّام عيني وانا بإيدين .. مغلوله

وقّفت .. مذهول وعيوني مدامعها
تشهق بدمع ٍ وقف .. بعيون مذهوله

صوّت .. ياعمّ .. تكفا .. بس اطالعها
وأشحذ وجيه العرب واقول :- قولوا له

عين ٍ تجوع السهر من شان تشبعها
ياتنعمي .. يا تخلّي النفس معلوله

قالوا تبيها نصيحه .. بندقك بعها
ماهيب صوب الجفول ولاهي بحوله

وامسيت .. وانا اطفي الشمعه .. وأولعها
في حروة الفجر .. مير الليل .. ياطوله

إن لمت عين ٍ .. بكتها الثانيه .. معها
وإن جيت ابانسى .. ولاهو شيّ .. ياهوله

من عقبها النفس طاري الورد .. يفجعها
وألعن ابو الورد .. كلّه .. واعشق ذبوله

وآخر سؤال ٍ .. حرم هالعين مضجعها
وأقفت .. تشوف الحقيقه شبه مجوله

ياخي .. اكفّر ذنوبي .. يمكن ابلعها
لكن اكفّر ذنوب الخلق .. معقوله؟!!