يا الدرب..ياللي نحرت المهمه الخالي
عرفتني..!!يابعد هالخبت ودروبه؟؟
عرفتني..ياموديني هوى بالي
من قبل ما ادله واقول التوبه التوبه؟؟
الله ما اوفاك..ياشوق اشهب الالي
تذكر خويك ثلاث سنين محسوبه
يادرب الاحباب..ياما كنت تطرالي
بالذات لاشفت..محبوب ومحبوبه
والشوق يوم يتمكن داله سالي
ذكى التعب في ملامح وجهه شحوبه
لاعاد يوم..تمادى الشوق بهبالي
وشريت معطوبة..من بيع معطوبه
كنت اتحرا ضمير غاب يصحى لي
خلقه ربي كذا..صحوته..غيبوبه
جيتك وانا احضن سوادك..بابيض الفالي
ورجعت والفكر سج يراجع ذنوبه
راح يتهجا يدور باول وتالي
ذنب جنيته وصاروا لاجله عقوبه
اللي غدا المر لرضاهم تقل حالي
ثم اتركوني جسد..والقلب قفوا به
كنت أحسب الدار هي داري ومنزالي
آثر العرب بدلوا وش هو..بوش هو به
يرجون "أبو زيد" وآنا ماني هلالي
أنا سنافي على قوسه لبس ثوبه
أشوف جداتي..بعين أصغر عيالي
الطيب والمرجله ورث تواصوا به
تقل إن "جدي" قرى كفي وفنجالي
يومه يحذرني من الوقت واسلوبه
يرحمك عودٍ جميع أقواله امثالي
يقول قبل يتوسد راسه..الطوبه
"في جيبك ريال..فانت تساوي ريالي
هالوقت صار السنافي قدره جيوبه
يما يحداه الزمان لكل دجالي
يما يصير الوفا والطيب عذروبه"
وش لي وبير خلط بزلاله..حثالي
آموت ظامي..ويخسى البير وغروبه
يارجع واصلي صلاة الغايب اشوى لي
حتى يوافي خفوق غاب مكتوبه
يالدرب..ياللي انكتب ممشاك غربالي
نسيتني..دراهم وش حدني صوبه
إلا تذكرت!!جيت أقول يالغالي:
لو جوك قول الدحيمي قال لي دوبه
اليوم والله لو يطرون في بالي
قمت اتوضى..وارتل سورة التوبه
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.