ياخشف لو ما فالكلام تجارة
بقول لك قولي وعقبه ماشي
الزين بيّن لو عليه ستارة
ياغصن ابانٍ مرتوي ونشاشي
عكش الهدب لو شن يمي غارة
صاب الضماير والحنايا عطاشي
والجيب فاتح لو تزر زراره
صفحة بياضه بالقلم تنّاشي
وراك طعت اللي عذل واشواره
ان كان قلبك صدق كنه شاشي
منبوذ راعي النيّه البواره
الغل في كبده يعرش عراشي
مانيب من يختال عورة جاره
كنّه مديّن والبلا غشاشي
ترى نفاقه زايدٍ معياره
يلعب على الحبلين وهو الواشي
وياربعنا اللي تقطنون الحارة
يحول من دون العجاج إرشاشي
حاولت اجامل بالغزل واشعاره
مار البلا من حاجةٍ في جاشي
والطرقي اللي ما انتهى مشواره
يرفض يرافق مرتشي مع راشي
وان شاف رايش ماعطاه اخباره
لو مات / مع بعض العرب ماعاشي
وزن الذهب بجنيهه وقنطاره
واليوم وزنه رشرش الرشراشي
والحر ماياكر بغير اوكاره
وان حام في جو اخمر الهقاشي
وياذيب ياللي في القنيب اسراره
حيد الجبل عندك وخل الطاشي
خذ من سواد الليل ضوح اقماره
واحذر من اهل الضيعه المغباشي
لو معك منظارك مع النظّارة
لا تأمن عيونك يجيها إغباشي
لايذبحك شاوي بثار جفاره
فالذيب ماعاض الجفر والحاشي
من لا ينيشن يوم يرمي الشارة
ذخيرته راحت عليه إبلاشي
وسود الليالي توصف الغدارة
ماتظهر الشوكة بلا منقاشي
ولا هنت ياوقتً مضى واذكاره
اللعب عرقيشه مع العرقاشي
ومن جاد جوده ماهجوا خطّاره
ووقت اللقا من لاغضب ماهاشي
ومافيه شك الدر فالمحّاره
والا الصناعي صانعه يعتاشي
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.