ياللي تعاتبني بليا بصيره
لاتحسبني عنك ماني بداري
إحذر ترا هيجات فكري خطيره
هواك لايبني عليك الذواري
وإحط هرجتك الطويله قصيره
لاصار ما قلبك من الحقد باري
ماني بمثلك ياردي السريره
إعطيك بالمعنى شهود ومواري
مشاعري شرواك ماتستشيره
في طيبٍ عزمك معه مايجاري
الطيب من ساسه ماهو مستعيره
ملحان إبن خالد وجدة مشاري
روس الشيوخ اللي تقود ا لجريره
لاولعت نار الحرايب جهاري
يردون لاثارت رعود الذخيره
في يومٍ أكدر بين بايع وشاري
والخيل بسهوم المنايا مغيره
فرسان فيها المنتخي والمثاري
يلقونها بمصقلاتٍ شطيره
وشلفٍ مضاربها وساع المفاري
ياما إنحدر بنحورهم من عثيره
وجابوا مراكيب النشاما عواري
زحام الحريب اللي تفك القصيره
يشهد طلال بحادثٍ فيه جاري
شيوخ لاعدت رموز الجزيره
يظهر لهم بين المشاهير طاري
وقفايهم بين الحمايل كبيره
أمجاد تبنيها جدود الذراري
على الطريق مواصلين المسيره
وهذا ولد خالد جديد الأثاري
ياما عطا طير السعد من بريره
عطية اللي للمواجيب ضاري
إن كان في راسك على الطيب غيَره
إفعل مثل فعله وأنا فيك أماري
لاتحسب إن الطيب هرجٍ تثيره
مع الخيال وضيعة الفكر ساري
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.