بــســم الله الـرحــــمــــن

من أسهل الاشياء .. تكذيب الأموات
و من أصعب الأشياء .. تصديق حيين

و اللي يبي يكذب على الحق .. مافات
مع دورة الايام .. يكشف بعد حين

و لا تهوز العاليات الطويلات
هياكلً ماهي على الشرع و الدين

سبحان من صف الجبال المنيفات
و أنزل على عبده .. تبارك و ياسين

ربً خلق لب العقول .. الملمات
في روس من ذاقوا من العسر و اللين

سبحانه القادر على النفس و الذات
أعوذ به من شر كل الشياطين

و أعوذ به من شر شيءً علي أات
بسم الله الرحمن .. قالوا هل العين:

يا ربعنا .. سكان دولة الامارات
صلوا ..ترى خير الانام المصلين

تقبلوا قبلة نبي الكرامات
و تصبروا .. عز الله انٌا مولين

تشهدوا .. فالسجدتين الاخيرات
و تمرغوا بالطين .. دام البشر طين

يقول من عدى بروس المطلات
سلام غالي .. مقصدي عند غالين

لو يذبح الرجال .. (غلطة بدايات)
ضعنا بلا وجهة طريق و عناوين

تشابه أبطال القصص و الحكايات
يفرق .. و لا كلمة تشابه ملايين

يعني بصراحه .. ما قطعنا اشارات
و لا كفرنا .. بالرسل و النبيين

تتشابه الاسماء .. قبل الروايات
حرب العراقي .. او.. خيانة فلسطين

ناسً تقول الطيب .. ورث (العبيات)
و ناسً تقول الطيب .. ورث(الحمادين)

و في شرطة الدمام .. قسم الجنايات
ثلاثة ارباع الخلايق.. مساجين

معاملات .. ارقام .. حفنة ملفات
و ناس بتعاملهم مع الناس .. سمحين

ولو قدم المظلوم للضابط .. أثبات
ماقال له مسموح .. يا سور برلين

مدري خطاك السو .. و الا سلامات
أسأل اذا وجهت عمرك .. على وين؟

لو تحزن الكتله .. لحزن الجزيئات
ما للسهر فالعين .. كفين و يدين

و الحزن .. يقطع في عروقي مسافات
الين يبقى تالي العمر .. شبرين

يا نجم شعرك .. لا .. يا نجم اللقاءات
يا صعب هقوات الرجال المساكين

بغوا يصيدونك .. محبين الاصوات
و انا و ابو سلطان وقفاتنا بين

كفك .. و راسك .. كلهن مستحيلات
و حنا نقيس و لا تضيع الموازين

كم نلحق الخطوات .. خطوات .. خطوات
عشانا نطلع فأخويانا موفين

ربعي تحملني كبار المهمات
و انا محملها على زينها .. زين

ياليتها تدري عن الحال لحظات
ما كان للدمعات فيني .. مضامين

و الصفحه اللي .. عقبها عشر صفحات
ضمت..اجابات و ثقافه و اميرين

يعني الشعر ماهوب كل العلاقات
و لا يدخل بتركيب دمك .. ولاالجين

يا صاحبي .. مافات .. ماله محاتات
الراس حي .. و لا تهون الشرايين

ما يعشق (الظهران) .. رمش (القريات)
وهم على وجه الخريطه .. مقيمين

و الشعر .. و الجوال .. و الميل .. و الشات
هي أخطر اسباب انحراف المحبين

يبقى الشعر .. ديوان كل الحضارات
وانت بعيوني .. وين ما اوجه تبين

لا جاك من دنياك ضيقه .. و صكات
و أبوك شيخ و في خوالك سلاطين

واخذت منهم في عروقك .. كريات
أضحك .. تراها تنحسب فالموازين

و انا معي من ضيقة الصدر شيكات
مغير أحررها على الدمع و العين

أسج عنها .. و اجتنبها .. و الا جات
تقول فاتح لي من الدمع .. ولفين

من يوم ما جت .. للرجوله علامات
حتى شهر تسعه .. من الفين و اثنين

وأنا مغير ابكي على الحال .. بسكات
مغير أسدد دين الايام .. بالدين

عندي من الاخلاص .. ختم و شهادات
و قصيدةً .. بكفيك عنها ببيتين

يالآدمي .. و أفراح عمرك بطاقات
عن لذة الدنيا .. ترانا مقفين

لو تشتري كل الاراضي مساحات
مالك سوى .. قطعة قماشه و مترين

ولو تنشر بكل .. الصحف و المجلات
النعي حقك ينشرونه بسطرين

ولو تنتهي من هات .. و تطيح في هات
يالآدمي .. عز الله أنٌا مولين