قصيدة ابن جلبان
دايم بيوتك يابو نايف لها ذوق
والا الشعر زينه وشينه كثيري
تسمو معاني شعرك الراقيه فوق
سهلٍ بحال وحال صعب وعسيري
بسلوب سهل وممتنع غير مطروق
ينقاد للمعنى بسلك الحريري
اتوق لاشعارك ويدفعني الشوق
وادري بعد به ناس تشتاق غيري
ارجوك لاتبخل بكلمه ومنطوق
واصل خطاك الثابته بالمسيري
واتحف جماهير(ن) لها اشعارك تروق
مثل الزهور الفايحه بالعبيري
فرايد(ن) وسمك عليهن كما الطوق
ماتسلب المعنى ولا تستعيري
الله جعل بالناس ميزات وفروق
هذا يصير لذا وذا مايصيري
قلته لو اني بالتماثيل مسبوق
لاشك اعبر عن مشاعر ضميري
واسلم ودم ماخلق بالكون مخلوق
وما رف بالجنحان طير(ن) يطيري
***
ردابن عون
مادير في بيض الفناجيل مسيوق
كيفٍ يساق لكل وجه سفيري
ترحيباحلا من حلا عطّف النوق
باللي وردني من مشاعر قصيري
اللي كسر عن فاخر الطيب صندوق
وترجم شذاه اعجاب عبر الأثيري
كم لي وانا عن يمة الشعر مصفوق
عقب اشترك فيه العمى والبصيري
نفسي تتوق وهاجسي عنه معيوق
مثل الحكير اللي جناحه كسيري
ومن يوم هادي ساق لي منه طاروق
الغارزات استرسلت بالدريري
ياعاشق العليا لها صرت معشوق
ذوقك رفيع ولا مداك بقصيري
ساقك طموحك عن وضيع البنا سوق
للمركز اللي فيه مالك خشيري
وحنا لو الحاضر جعلناه مفهوق
اعرف ترى قدرك علينا كبيري
واقبل تحياتٍ بها الشكر مرفوق
وعن مايكن الصدر شح تعبيري
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.