الجارحه ..!!

لجت رعودٍ مهلكه ...... بين الغيوم المظلمه.
واللي جنيته يافهد ... صوره بعيني معتمه.!!

اخاف اميزها وانا رجال في صدري عتب.
على هنوفٍ ... ولّعت فيني مشاعر مسلمه.!!

الجادل اللي روّحت بالقلب واهدتني ألم.
اهديتها روح الوفا ........ والفكر كله وقلمه.!!

لا مرت الذكرى ... يعانقها الفكر وتعانقه.
ذكرى حرقها الشوق والتفكير فيها معظمه.!!

امسي بها واصبح بها بالنثر والاّ بالشعر.
والشعر عندي حبكته مثل الخرز لو تنظمه.!!

راغت وعيّت تعترف والشعر للقلب اعترف.
المنحرف ....... احيان يفقد له زوايا قايمه.!!

ناديتها بالشعر واحساس المعاني والوفا.
لكنها راحت ........ وخلت لي جروحٍ مؤلمه.!!

عاهدتها ثم عاهدت واوعدتها ثم شفتها.
تنقض وعود موثقه .... فيها طباع مسيلمه.!!

صديت عنها والالم بالقلب يحكيه القلم.
جرح المحبه صعب يافكري .. ولا له ترجمه.!!

اليا تماثل للشفا جتني طواري ماضيه.
دايم طواريها على جرحي تمر .... وتلطمه.!!

نسيانها فيه العنا .. فيه الهنا فيه الدوا.
والحب في نهج الشريعه.! جاز محدٍ حرّمه.!!

قررت اشيل الجرح تقديرٍ لروح الجارحه.
ذكرى غلا عايش بها جرحٍ فتح جوفي فمه.!!