حافر الحفره ...!

انشد الرجال والاّ شف خويه.
بس حذرى لا توصلها الميانه.

معدن الرجال من هذي وذيه.
قالها من هو .. توشح بالفطانه.

وامتحان الوقت ميلاتٍ قويه.
الزحول تبان في وقت امتحانه.

ياسعد لو منت في حاجة وصيه.
غيرنا ... يبغى وصايا في زمانه.

كل منطق يعطي العارف هديه.
مربطه يالقرم كلمه من لسانه.

بالمعادن .... الذهب مافيه زيه.
وبالرجال النادرين اهل الرزانه.

مدرسة وقتٍ .! بها خير وأذيه.
للغثا خانه ولأهل الطيب دانه.

والردي موسوم دايم بالرديه.
لو تخسر المال .. لا تقعد وزانه.

مجلسك .. خله مع اوجيهٍ نديه.
مجلسٍ .! مابين مطنوخ وتكانه.

والمريض .. اللي تبجح بالخطيه.
انجح الكيه ... قبل يترك مكانه.

يعتبر غيره ... وعِبره .. للمنيه.
وكل نيه بايته .. تشري حصانه.

والشوارب لو تلابخ بالقضيه.
كل شارب له مقصه من بيانه.

ومن يذل الروح في رغبه دنيه.
يمتلي وجهه من جْروح الاهانه.

الخطآ ...! راعيه في وقته ضحيه.
حافر الحفره ..... يورّى له أمانه.

وحارثين الشر .. في كلمه خفيه.
كل قبرٍ.! من حصى جوفه دفانه.

والعيون اللي مرايا كل نيه.
تكشف اللي ممتلي حقد ولعانه.

والصدور الدينه .... مثل الخليه.
الشهد تلقاه .... في وجه وبطانه.