الاسطوره

ماتقبلت الفراق...ولا ليدي فيه حيله
آه لو ان الظروف المقبله تكشف قدرها

لو يعرف الشخص منا...وش مع الغيب بيجي له؟
كان جنبنا المصايب من قبل يوقع ضررها

ماهقيت الليله اللي جابت الفرقا طويله
لين صارت ليلة أمس بعيني أطول من شهرها

العذاب اللي يذوب فعين من يفقد خليله
عندي اكبر من عذاب العين لو تفقد نظرها

والحبيب اللي صدوده مثل مداته:جزيله!
صد عني واعرفه...لاصد عن حاجه هجرها

كن روحي يوم حست في جفاه وصعب نيله
بشرتني بالضياع وشدت العزم لسفرها

مارحمها من هلاك ولا تقبلها دخيله
تحتضر قدام عينه..لين ماتت من قهرها

عاد...ليت اللي ذبحها..وارهب الموت بوسيله
مادفن وجه الضحيه والسكاكين بنحرها

ليت قلبه يوم طاوع فعلته..كمل جميله
لو غسلها من دموعه وبكفن صدره قبرها!

من حفر بضلوع قلبه...حفرة تكفي قتيله
واجبه يدفن قتيله بالضلوع اللي حفرها

رحت اسولف للجبال الصم عن قصة رحيله
ماتركت متونها إلا...ينحت الدمع بصخرها

اشتكيته للرفوف...وللبراويز الهزيله
وانذعرت من النياح اللي سمعته في صورها

واحد حقق جماله...كذب اساطير الف ليله
يسكن السبع البحور ويحبس الحور بدررها

الدروب بكبرياها ترتجف تحته ذليله
والورود اللي تقبل خطوته تنبت باثرها

والغصون اليا بغاها تنثني له؟...تنثني له!
والرياض ان حب ينثر عطرها..يلمس زهرها

لو هجر..جرد الفيافي واحرم اقصاها مخيله
يذبح عروق الفياض...ويطعن البيد بظهرها

كل حاجة تستوي له...لو بغاها تستوي له:
طاعته...واستغفر الله لو باقول انه سحرها

ذاك بس لو يتمنى..فاكهة شجره ظليله
بس يفتح راحة ايده:وايتساقط له ثمرها

كن ربي سخر له المعجزات المستحيله
واصبح اسطوره...وكل الألسنة تنقل خبرها

هتن محجر دمع عيني...لين جفف سلسبيله
والتفت لاخير دمعه"قبلت يده"..ونثرها!!

دمعة كن بشقاها..,يوم طاحت في شليله
جادل جات بدوي تطلب الستر:وسترها!!

لو طعوني بالسكاكين بيده تشفي غليله؟
لاشتريها من عذابي..وادفع بدمي مهرها

واطلبه ينهال فيني طعن...لين يطيح حيله
بس لايترك عيوني تنحرم نعمة بصرها

له بعيني مثل ما للطهر بالنفس الأصيله
تقطع ايدين الردى لو مس شعره من شعرها

ثالث الغالين عندي...لا معاه ولا بديله
كان اخير اسرى ضلوعي..والوحيد اللي كسرها

له علي انه ليا من طاح من عيني تشيله
ولي عليه انه يرجع لابتساماتي ثغرها

مامشيته غير درب شتت اقدام الدليله
مزنة مابللتني..واستحيت اطلب مطرها

والحوايج من يدين الخلق للطالب قليله
والعطايا من يد الله..للعباد اجل وارهى

وان نسيت اني زرعت العشق وحظوظي بخيله
مانسيت ان الوهايب تستحق اللي شكرها

صعب تلقى شخص وافي...يجزي الطيب بمثيله
والعرب قد قالت ان الناس ماتترك قشرها