ياصاحبي ماني على النفس راضي = وأحس بأشياء تعتريني..سخيفه

ألياأختلت نفسي بحلو الفياضي = قامت تسريني همومي بكيفه

وآخذ معه سجه أليا صرت فاضي = ياما تشوف دموع عيني ذريفه

تطري علي اللي عيونه قواضي = خشف(ن) يعرض بالفياض المريفه

أبو جديل(ن) فوق الامتان حاضي = أليا لعب به باليدين الصخيفه

كنه شليل اللي ضرت للركاضي = مهرة شجاع..وطارد(ن) له نكيفه

أليا أبتسم لي بالثمان النواضي = وشفت الشهد فوق الثنايا الرهيفه

هذيك بهجة خاطري ياأبو تاضي = تشرح لها صدر(ن) همومه كليفه

لا شك راح وكل ماراح ماضي = ماباقي(ن) من حضرته ..غير طيفه

لا مر..مني هايض القلب ناضي = وخلا معاليق الحنايا مقيفه

قفت به الأيام عني وعاضي = فرقاي..بغلام(ن) غدالي خليفه

أنا أشهد أن اللي ببيته حضاضي = لا واهني منهو خذاها..وليفه

شبعوا منه..وأنا عيوني مراضي =(( يالله عساها عقب شوفه كفيفه))

ولو قابلتني ترفة(ن) بأعتراضي = ماألد له طرف(ن) ولو هي خفيفه

مانكسب الهزلات عقب الغلاضي = وعاداتنا طرد المقفي..نعيفه

صابر لحكم اللي مهو حكم قاضي = عالم خفايا جلها والضعيفه

وعسى العوض باللي طوال(ن)..عراضي = منازل الجنات ماأحد(ن) يعيفه