وقفت أوادع منوة القلب والروح = قدام بيته قابلتني لحاله

كنه تقول بعبرة الصوت لي روح = عسى دروبك ياعشيري سهاله

وشفت أبتسامه بس من قلب مجروح = وسايرتها من باب رد الجماله

نظرات عينه ترسم الحزن والنوح = حتى تغير من فزعها جماله

أبطيت لو مالي مع الترف مصلوح = أقرأ كلام عيونها وأرتجاله

كن العيون تقول والقلب ساموح = خل السفر وأترك هواه ومجاله

قلت السفر لا يابعد كل مملوح = غصب(ن) على نفسي وكيفه وباله

قالت عليك أخاف من كل ذاروح = وشلون من درب السفر وأرتحاله؟؟

قلت الله اللي ساتر الفلك مع نوح = يستر على عبد(ن) شكى وألتجاله

واللي كتب رب الملا داخل اللوح = يبي يصير ولو بغينا زواله

لكن طلبتك حاجت(ن) قبل لا أروح = حلي ضمير(ن) شوفتك رأس ماله

قالت توكل ياهوى البال مسموح = ماشفت منك ألا الوفاء والشكاله

وادعتها والدمع بالخد مفضوح = والهم وسط الصدر لج(ن) جباله

يافوح كبدي لاطرت منوتي فوح = فوح الدلال اللي على النار جاله

وياكبر جرح(ن) باوسط القلب مفتوح = بأسباب غرو(ن) تل قلبي خياله

تل أشقر(ن) بين المحابيل مطروح = يبي الخلاص وجودت به حباله

مشيت من عنده وأنا فاقد الروح = عقلي وقلبي والضماير حلاله

وصاحت وفجر صمتها كلمة البوح = عسى السفر يانور عيني سهاله