الله يجملني معك وأرد لك بعض الجميل = اللي عملته بي..لو أني مأخذن في خاطري

قربك هو أعظم شي علمني أهين المستحيل = وصدك هو اللي محرقن روحي قبل مشاعري

ياصاحبي ماللموادع ذنب في نعش القتيل = أنت تعرفني لادعيت..أفرح وأجيك من آخري

وش له تقول أنت السبب باللي حصل؟ ولا تخيل = الهم يسلب فرحتي.. والحزن يعصر ضامري

صحيح أنا أول من نوى الفرقا وعزّّّّم للرحيل = وصحيح فكري قص من دنيا العناء تذاكري

لكن قلبي مايميل ألا لمن غصنه يميل = وأكبر دليل العبره اللي فجرت محاجري

يوم أن عزة نفسي أغرتني على الدرب الطويل = سهجت رجلي والدموع أمست توسم صابري

الى متى وأنا العزيز اللي تحت حكمك ذليل؟ = وألى متى يانفس شومي عن خطاه وكابري؟!!

الى متى وأنا أرجي الهمال من كف البخيل؟ = والى متى غيمك يردد عن محيري..سافري؟

أنا الفقير اللي زرعت ولاجنيت من الحصيل = وأنا الغني اللي كسبت رضاي من خسايري

أنا الأمل لو خيبتي ماطاولتني..ربع ميل = وأنا كبير اليأس لامنه فتش سرايري

تعبت أواكب رحلة الحرمان والحظ العليل = وأقول يانفس المعزه في طريقه ثابري

أما أني ألقى عن هجير الوقت في قلبه مقيل؟ = ولا بلاش وياعيوني عن عيونه..هاجري

حاولت أجمل حالي بعينك ولو ماني جميل = وأصبر على ظلمك لو أني مأخذن في خاطري

بقولك كلمه ودور من بعدها لي بديل = موتي يهون..ولايموت الحب في مشاعري