ماني من اللي يجزي الطيب بجحود = أخلصت لك وأوفيت لك..وأنت داري

هفوة ذكي..منك على غير مقصود = خليتها مني وتبغى أعتذاري

أرجوك لاتظلم ترى الظلم مردود = ولا عاد يطري لك من الوصل طاري

ياما عليك أحن وأشتاق وأرود = يوم ان حبك بالشرايين جاري

وياما عليك أخاف من كل منقود = وللوصل أسوق الروح سوق أنتحاري

بذكرك في شي عندي له شهود = وعينين من عقبك تهل العباري

تذكر هدايا عيدك..سوار وورود = يومك ضحكت وفي يدينك سواري

ماقلت من جملة مواثيق وعهود؟؟ = ماأنساك لو تنسى يميني يساري

اليوم جازيت الوفاء مني صدود = لين جمرت بين المعاليق ناري

حبك تلاشى مابقى منه العود = شين قضى مابين بايع وشاري

تبيع ماحصلت من بيعتك فود = وانا علي أشقى وأحاتي وأداري

جيت بتكحل عيني أعميتها زود = وأنا على الفرقا عزمت أختياري

والحين روح أرجوك..من غير مطرود = لعلي أنسى عقب فرقاك ثأري

من عقب مامات الزهر وأيبس العود = وخليت للذكرى بكفك سواري

تكفى تخلي دربي اليوم مسدود = ولا عاد يطري لك من الوصل طاري